နီထွေးကလေး လှသွားပြီ

သီတင်းကျွတ်ကျောင်းပိတ်ရက်မတိုင်မီ အဖေအလုပ်တာဝန်ကျရာမြို့လေးကို ကျွန်မတို့သားအမိတွေ ပြောင်းလာခဲ့ချိန်က မိုးတွေက သည်းကြီးမည်းကြီး ရွာနေတဲ့အချိန်ပေါ့။  ၅ တန်းတက်နေရင်းတန်းလန်းနဲ့ သူငယ်ချင်းတွေကို ခွဲပြီး လိုက်လာခဲ့ရတော့ စိတ်ထဲမှာတော့ ၀မ်းနည်းနေတာတော့အမှန်။  အဲဒီအချိန်တုန်းက ကျွန်မဟာ အဖြူရောင်တွေကို အရမ်းနှစ်သက်တဲ့ ငွေရောင် မင်းသမီးလေးပေါ့။ ကျွန်မကျောင်းဝတ်စုံလေးဟာ အမြဲဖြူဖွေးရှင်းသန့်နေတယ်။ ကျောင်းလွယ်အိတ်လေးကလည်း အဖြူရောင်ပဲ။ ကျွန်မကိုချစ်တဲ့ မေမေကလည်း ကျွန်မအတွက်ဆိုရင် ဖိနပ်လေးကအစ အဖြူရောင်ကိုပဲ ဆင်ပေးပါတယ်။ မနက်ကျောင်းသွားရင် ပုခုံးလောက်ပဲရှိတဲ့ ဆံပင်နက်နက်လေးကို မေမေက နှစ်ဘက်ခွဲပြီး အဖြူရောင်ဖဲကြိုးလေးနဲ့ ချည်နှောင်ပေးပါတယ်။ မြို့ကျောင်းမှာအဖြူရောင်မင်းသမီးလေးလို ကျောင်းတက်ခဲ့တဲ့ကျွန်မဟာ ဖေဖေအလုပ်ပြောင်းရွှေ့တဲ့ မြို့ငယ်လေးကို ရောက်တဲ့အချိန်မှာ မင်းသမီးလေး တောဆင်းလာရတယ်လို့တောင် ကိုယ့်ကိုယ်ကို ထင်မိပါတယ်။

.

ဒီမြို့လေးကို ရောက်ရောက်ခြင်းမှာ ပထမဆုံး စိတ်ပျက်သွားတာက ကတ္တရာလမ်းဟောင်းလေးပါ။ ချိင့်ရာတွေထင်နေတဲ့လမ်းတွေဟာ ဘယ်လိုပဲကြည့်ကြည့် အရုပ်ဆိုး အကျည်းတန်နေပါတယ်။ ရှေးဟောင်းအိမ်လို ရေနံချေးတွေသုတ်ထားတဲ့ နှစ်ထပ်အိမ်တွေကို ဒီမြို့လေးမှာ အများအပြားတွေ့ရပါတယ်။ ခြံစည်းရိုးတွေကိုလည်း သစ်တိုင်နဲ့၊ ရေနံချေးမည်းမည်းတွေနဲ့။ ကျွန်မတို့နေဖို့စီစဉ်ထားတဲ့ အိမ်ဆိုရင်လည်း ဒီအတိုင်းပဲ။ ကျွန်မရောက်ခါစကဆို အိမ်နံရံကို မှီ မိမှာကို အရမ်းစိုးရိမ်တာပဲ။ ကျွန်မရဲ့ တီရှပ်ဖြူဖြူလေးတွေ၊ ဘောင်းဘီဖြူဖြူလေးတွေ မည်းသွားမှာကို အရမ်းကြောက်တာပဲ။ မေမေနဲ့ ဖေဖေကတော့ လေကောင်းလေသန့်ရှုရတဲ့မြို့လေး၊ စိတ်ထားဖြူစင်တဲ့မြို့လေးဆိုပြီး အရမ်းကိုနှစ်သက်သဘောကျ နေလေရဲ့။

.

ညနေစောင်း ဖေဖေရုံးကပြန်လာချိန်ရောက်ရင် ကျွန်မတို့တွေ မြို့လေးရဲ့ အပြင်မှာ ရစ်ခွေစီးဆင်းနေတဲ့ မြစ်နံဘေးကို လမ်းလျှောက်ထွက်ကြပါတယ်။ ဖေဖေနဲ့မေမေတို့ အသက် ၄၀ နားရောက်မှ ကျွန်မကို မွေးခဲ့တာဆိုတော့ အခု ကျွန်မအသက် ၁၀ နှစ်လောက်ရောက်တဲ့အချိန်မှာ ဖေဖေတို့က ၅၀ ကျော်နေပြီ။ တစ်ဥိးတည်းသောသမီးဖြစ်တဲ့ ကျွန်မကို တုန်နေအောင်ချစ်သလို ကျွန်မလိုချင်ရာမှန်သမျှကို ဖြည့်ဆည်းပေးခဲ့တဲ့ ဖေဖေတို့ဟာ အရုပ်ဆိုးအကျည်း တန်တဲ့ ဒီမြို့လေးကို ဘာလို့များ နှစ်သက်နေတာပါလိမ့်။

.

ကျွန်မကျောင်းသွားတဲ့လမ်းဟာ မြက်ခင်းစိမ်းစိမ်းတွေရှိပေမယ့် ကျွန်မကတော့ မြွေကြောက်တတ်သူမို့ အဲဒီလမ်းလေးကို သဘောမကျပါဘူး။ မြို့ရဲ့တစ်ခုတည်းသော အထက်တန်းကျောင်းလေးမှာ ကျွန်မက ကျောင်းဆက်တက်လို့ တစ်ပတ်ပြည့်သွားတဲ့အချိန်အထိ ကျွန်မဘေးနားမှာ အတူထိုင်တဲ့အဖော်သူငယ်ချင်းမရှိသေးပါဘူး။ အရင်တုန်းက ကောင်မလေးတစ်ယောက်တည်း ထိုင်တဲ့ခုံမှာ ကျွန်မကို နေရာချထားပေးပေမယ့် အခုအဲဒီကောင်မလေးက ခွင့်ယူထားတဲ့အချိန်တဲ့။ ကျောင်းသွား၊ ကျောင်းပြန်အဖော်မရှိသေးပေမယ့် အတန်းပိုင်ဆရာမနဲ့က အိမ်ချင်းနီေးတာ့ အတူတူသွားဖြစ်ပါတယ်။

.

.ဒီနေ့တော့ ကျောင်းရောက်ရောက်ခြင်း ကျွန်မခုံမှာ ထိုင်နေတဲ့ ကောင်မလေးတစ်ယောက်ကို တွေ့ပါပြီ။ အဖော်ရောက်လာပြီဆိုပြိ ၀မ်းသာသွားတဲ့ ကျွန်မဟာ စောစောကကောင်မလေးကို မြင်လိုက်ရတယ်ဆိုရင်ပဲ

“ အလိုလေး …ကျွန်မနားက ကောင်မလေးဟာ အရုပ်ဆိုးလိုက်တာ”။ သူမရဲ့ အသားဟာ ညိုတယ်ဆိုတာထက် လွန်ကဲပြီး အတော်ကိုမည်းတဲ့အထဲမှာ ပါနေပါတယ်။ မျက်လုံးပေါက်ကလေး ပါတယ်ဆိုရုံလေး။ သူမစာရေးတဲ့ညာဘက် လက်ခုံမှာလည်း အမာရွတ်ကြီးနဲ့။ သူမရဲ့ ကျောင်းဝတ်စုံဟာ နွမ်းဖတ်လို့။ ကျွန်မလို ဖဲကြိုးလေးစည်းမထားတဲ့သူမရဲ့ ဆံပင်ဟာ နီကျင်ကျင်နဲ့။ အဲဒီဆံပင်နီကြောင်ကြောင်နဲ့ကောင်မလေးဟာ ကျွန်မကို တစ်ချက်လေး စောင်းငဲ့ကြည့်ပြီး ရယ်ပြလိုက်တဲ့အခါ သူမရဲ့ သွားတွေကလည်း ဝါလို့။

.

ကျွန်မကို ဘာလို့များ သူ့အနားမှာထားတာပါလိမ့်။ အတန်းပိုင်ဆရာမကတော့ ကျွန်မအကြည့်ကို နားလည်တယ်ထင်ပါရဲ့။ ကျွန်မကို ပြုံးကြည့်နေတယ်။ ညနေကျောင်းဆင်းတော့ ဆရာမကိုမေးချင်တဲ့ မေးခွန်းတွေပြည့်နေတယ်။    ၀ိုင်းပြီးနှုတ်ဆက်နေကြတဲ့ တပည့်တွေကို ပြုံးပြုံးလေးနဲ့ စကားပြောနေတဲ့ ဆရာမဟာ တကယ့်ကို ချောမောလှပတဲ့အမျိုးသမီးလေးပါ။ ဒါနဲ့များ ဘာလို့ ဒီလိုရုပ်ဆိုးဆိုးမြို့လေးမှာ ဆရာမ လာလုပ်နေတာပါလိမ့်။ ကျွန်မသိချင်စိတ်ကို ဘယ်လိုမှ မအောင့်အည်းနိုင်ဘူး။

“ဆရာမ၊ ဒီမြို့လေးက အရမ်းရုပ်ဆိုးတာပဲနော်။ လမ်းတွေကလည်း ဆိုးတယ်၊ ခြံတွေကလည်း မလှဘူး။ ပြီးတော့ သမီးဘေးနားက နီထွေးဆိုတဲ့ ကောင်မလေးကလည်း ရုပ်ဆိုးတယ်။ ဒီလောက် အကျည်းတန်တဲ့ မြို့လေးမှာ ဆရာမချောချောလေးက ဘာဖြစ်လို့ လာလုပ်နေတာလဲ”

ကျွန်မမေးတာကို ဆရာမက ဘာမှ အဖြေမပေးသေးဘဲနဲ့ သူမကို နှုတ်ဆက်နေတဲ့ နီထွေးကို ပြန်ပြိး စကားပြောနေတယ်။ ကျွန်မတို့ရှေ့ကို နည်းနည်းလျှောက်သွားတော့ ကလေးတွေကို ပူဖောင်းရောင်းနေတဲ့ လူကြီးတစ်ယောက်ကိုတွေ့ပါတယ်။ ကျောင်းဆင်းချိန်ဆိုတော့ မူလတန်းက ကလေးတွေဟာ သူ့အနားမှာ ဝိုင်းအုံလို့။ ဟိုကလေးက တစ်လုံးဆွဲလိုက်၊ ဒီကလေးက တစ်လုံးဆွဲလိုက်နဲ့၊ သူပါလာတဲ့ မိုးပျံပူဖောင်းလေးတွေဟာ တော်တော်လေးကို ရောင်းရပါတယ်။ အဲဒိပူစီဖောင်းရောင်းနေတဲ့ ဦးလေးကြီးကို ကြည့်ပြီး ဆရာမက ကျွန်မကို မေးခွန်းတစ်ခုမေးလိုက်ပါတယ်။

“သမီး အခုရောင်းနေတဲ့ ပူစီဖောင်းတွေထဲမှာ ဘာရောင်မပါဘူးလဲ။”

ကျွန်မစိတ်ထဲကနေ အရောင်တွေကို ရေတွက်ကြည့်လိုက်တယ်။ အဝါ၊ အစိမ်း၊ အနီ၊ အပြာ၊ ပန်းရောင်ဆိုပြီး အရောင်တွေ အမျိုးမျိုးတွေ့ပေမယ့် အနက်ရောင်မရှိဘူး။

“အနက်ရောင်မရှိတာ၊ ဆရာမ”

“အင်း၊ ဟုတ်တယ်သမီး၊ အနက်ရောင်မရှိဘူး။ ဘာလို့ မိုးပျံပူဖောင်း အနက်ရောင်မရှိတာလဲသမီး”

“အနက်ရောင်က လှမှ မလှတာ ဆရာမ” ကျွန်မက ချက်ခြင်းပြန်ဖြေတော့ ဆရာမက ခေါင်းညိမ့်ပြတယ်။

“ဟုတ်တယ် သမီး။ ကလေးတွေက အရောင်လှလှ မိုးပျံပူဖောင်းလေးတွေကို သဘောကျတယ်၊

အနက်ရောင်ဆိုရင် အရောင်မလှတော့ ကလေးတွေက ဘယ်ကြိုက်မလဲ၊ ဒါဆို မရောင်းရတော့ဘူးလေ ဟုတ်တယ်မလားသမီး။”

“ဟုတ်တယ် ဆရာမ။ သမီးဆို အရောင်လှလှ မိုးပျံဘောလုံးလေးပဲ ယူမယ်”

“အင်း၊ ဟုတ်ပါပြီသမီးရယ်။ ဒါဆို ဘောလုံးလေးတွေ မိုးပေါ်ပျံတက်နိုင်တာ အဲဒီဘောလုံးလေးရဲ့ အရောင်နဲ့ ဆိုင်သလားလို့ ပူဖောင်းရောင်းတဲ့သူကြီးကို သွားမေးကြည့်လိုက်သမီး”

ဒါနဲ့ကျွန်မလည်း ပူဖောင်းရောင်းတဲ့ဦးလေးကြီးနားကို သွားပြီးမေးလိုက်မိတယ်။

“လေးလေး၊ ဘောလုံးလေးတွေ မိုးပေါ်ပျံနိုင်တာ ဘာလို့လဲ”

ဘောလုံးရောင်းနေတဲ့ ဦးလေးကြီးဟာ သူ့နဖူးပေါ်စီးကျနေတဲ့ ချွေးတွေကို သုတ်ရင်းနဲ့ သူ့ဦးထုပ်လေးနဲ့ ယပ်ခတ်နေတာကနေ ကျွန်မကို တစ်ချက်မော့ကြည့်ပြီး အဖြေပေးတယ်။

“ဘောလုံးက မိုးပေါ်ပျံနိုင်တာ သူ့အထဲမှာပါတဲ့ဓါတ်ငွေ့ကြောင့်ပေါ့ သမီးငယ်ရဲ့။ ဘာဖြစ်လို့လဲ”

ကျွန်မခေါင်းခါပြရင်းနဲ့ ထပ်မေးမိတယ်။

“ဒါဆို လေးလေး ဘောလုံးလေးတွေ မိုးပေါ်ပျံတက်နိုင်တာ သူတို့ရဲ့အရောင်နဲ့ မဆိုင်ဘူးပေါ့ဟုတ်လား”

“ဟုတ်တယ် သမီး။ ဘောလုံးလေးတွေဟာ ဘာရောင်ပဲဖြစ်ဖြစ် မိုးပေါ်ပျံတက်ဖို့ဆိုရင် သူတို့အထဲကို ထည့်တဲ့ ဓါတ်ငွေ့နဲ့ပဲ ဆိုင်တယ်။”

“အရောင်လှတိုင်း မိုးပေါ်ပျံမယ့်ပူဖောင်းမဟုတ်ဘူးသမီး”

“အရောင်လှတိုင်း မိုးပေါ်ပျံမယ့်ပူဖောင်းမဟုတ်ဘူးသမီး”

“အရောင်လှတိုင်း မိုးပေါ်ပျံမယ့်ပူဖောင်းမဟုတ်ဘူးသမီး”

ကျွန်မဆရာမကို အဲဒီအကြောင်းပြောပြလိုက်တော့ ဆရာမက ပြုံးနေတယ်။

“ပူစီဖောင်းလေးတွေ မိုးပေါ်ပျံတက်ဖို့ အဲဒီဘောလုံးရဲ့ အရောင်နဲ့ မဆိုင်ဘူးသမီး။ ဘယ်လိုအရောင်မျိုးပဲဖြစ်ဖြစ်အပေါ်ကို အမြင့်ကို တက်နိုင်တယ်။ အဲဒါပေမယ့် သူမှာ အမြင့်ရောက်စေတဲ့ ဓါတ်ငွေ့လိုတယ်။  အဲဒီလိုပဲ လူတစ်ယောက်ရဲံ အောင်မြင်မှု၊ ရှုံးနိမ့်မှုတွေဟာ သူ့ရဲ့ ရုပ်အလှနဲ့ မဆိုင်ဘူးသမီး။ သူခံယူထားတဲ့ ဖြောင့်မတ်မှန်ကန်တဲ့ စိတ်ထားနဲ့ပဲ ဆိုင်တယ်။ သမီးဘေးနားမှာ ထိုင်တဲ့ နီထွေးဟာ တကယ့်ကို ပညာကို လိုချင်စိတ်ရှိတဲ့ကလေးမလေးပဲ။ ကျောင်းနေချင်လွန်းလို့ သူ့အမေရဲ့ အကြော်ဆိုင်ကိုကူရင်းကနေ ကျောင်းတက်နေရတာ။ သူ့လက်က ဒါဏ်ရာကလည်း သူ့အမေရဲ့ အကြော်တဲမှာ ကူပေးရင်းနဲ့ ဆီပူလောင်သွားလို့ အခုလို ဖြစ်နေတာသမီး။ တကယ်တော့ နီထွေးလေးဟာ မိုးပေါ်ပျံတက်မယ့် အနက်ရောင်ပူဖောင်လေးပါသမီး”

…

ဆရာမက စကားကို အရှည်ကြီးပြောပြီး လမ်းဘေးကို တစ်ချက်စောင်းကြည့်လိုက်တယ်။ မြက်ခင်းပျော့ပျော့လေးဟာ လေတိုက်တိုင်း ယိမ်းနွဲ့လို့။ မြို့လေးကပြင်ဘက် မြစ်ပြင်ကို ဖြတ်ပြီးလာခဲ့တဲ့ လေနုအေးလေးဟာ စိတ်ကို လန်းဆန်းသွားစေပါတယ်။ ဆရာမစကားကိုနားထောင်ပြီး ကျွန်မစိတ်တွေလည်း ကြည်လင်လာတယ်။ အခုတော့ မြို့လေးရဲ့အိမ်လေးတွေ လှသွားပြီ၊ လမ်းလေးတွေလည်း လှသွားပြိ၊ နီထွေးလေးလည်း လှသွားပါပြီ။

နွေလဲ့နှင်း